Magof Yu' Ni Finatto-mu! Maila Hålum Yan Ilao Håfa Guaha Guini!!!

Ai ya siña mohon hu ufresi hao gimen pat nengkanu'. Puedi ti un hinalang ya sumåga hao un råtu.
Put Fabot bibira hao tåtte guini mågi ya un bisisita yu' sessu sa' yahu ma bisita!!!



Friday, September 9, 2011

Poems

Si Nanåhu Biha

Guåhu unu na taotao
Ni sumen agradesi
Si Nanåhu Biha
Yan todu i ha padesi

Magåhit na meggai kastiguña
Annai gaige guini gi hilo tåno'
Lao ha usuni todu chinatsagåña
Sa' dichosa gue na kilisyånu

Dosse finañåguña
Yan i asaguåña Si Pedro
Lamita manlalåhi
Lamita manfamalaoan

Dos gi finañåguña
Fumo'naigue gi langet
Un palaoan, Si Lydia
Un låhi Si David

Ha poksai yu lokue
Yan i dos lahobin mañelu-hu
Guiya ha' namaisa
Sa' diningu as tatåhu bihu

Meggai ha fa'na'gue yu
Pot lina'la yan kustombre
Ya u mohon bai hu tunggo'
I dinanchi pat i lachi

I guinaiya ni ha na'i yu
Metgot yan mames
Ayu yu muna' mesngon
Ayu yu muna' kabåles

Ni ngaian Nanåhu Biha
Na bai hu maleffa nu hågu
Si Rena mames na'ån-mu
Chetton hao gi korason hu

Gosa Nåna pa'go i langet
Ya un gina'chungi as Yu'us Tåta
Sa' hagas mampos hao piniti
Ya un ha'ani ta'lo tafan hita


I Gekmin Na Taotao

I maneska hao muna' lamen
Kada ha'ani, kada puengi
Gigon matmata hao an oga'an
Un tutuhon gumimini

I gimen fo'tte itmås yamu
Sa' nina' chaddek hao butlåchu
Lao ti chacha' hao na taotao
Sa' an ti gumimen hao un laolao

Ti un tunggo' mamåhlao-mu
Sen paoguan hao yan applacha
Mumasoksok mampos taotaotao-mu
Ni un taotao malago' na un pinacha

Ti na'magof umadingan yan hågu
Sa todu paya' it fino'mu
Tenga un sångan iman chatfino'
Matto gi sen na'ma'åsi hao chelu-hu

Oholara mohon yaon måtai
Ya u fakpo i kastigu-mu
Ya si Yu'us un ina'asi'i
Ni i noskuåntos na isao-mu

Yanggin un takka' hulo' i langet
Sumen maolek siempre i sagå-mu
Mungga na tafan mamuni
Na tai-bali esta lina'lå'-mu

Hafa enao na ifisiu
I bumulåchu todu dia
Taya maolek humuyong-ña
Para un estotba ha' i taotao siha



FEGGE' GI INAI

Un puengi man guifi yu.
Hu guifi na mamomokkat yu gi
Kånton tasi gi echongñan i Asaina.
Annok gi mapagåhes i
sinisedeku siha ginen it lina'lå'hu.
Gi kada susedimento hu li'e na guaha
dos na fegge' gi inai: iyon i Asaina, yan iyoku.
Gi annai annok i kilu na
susedimentoku hu atan i fegge' gi inai.
Hu li'e na meggai na biåhi gi chalan
lina'la'hu maisa ha' na fegge' guaha.
Hu li'e lokkue na ayu ha' na taguenao
gi annai chumatsaga yan puminiti yu.
Mampos yu enkebukao nu ini,
ya hu faisen i Asaina:
YU'US, ilekmu na gigon hu tattiyi hao,
un adahi yu gi lina'lå'hu.
Lao hu li'e na gi annai måtto
gi chinatsagåku maisa ha' na
fegge' guaha gi inai.
Ti hu tunggo' haftaimanu na gi annai
hu gof nisisita hao, enao nai un dingo yu.
Ineppe yu as YU'US:
"Lahihu, guinaiyaku na patgon-hu, tunggo' na
hu sen guaiya hao ya ni ngai'an na hu dingo hao.
Gi chinatsagågå-mu yan pinititi-mu
annai maisa ha' annok na fegge' gi inai,
yuhi lahi-hu, annai hu hohoggue hao."


MALANGU

Matmata yu miniguan
Tuhu i mikos gi sakos-hu
Duru yu lokkue lo'lo'
Ai na binaba mumalångu

Ti siña yu tumachu
Sa' mampos malinik ilu-hu
Hu padesi muma-enpon
Para i kemmon ha' i chi-hu

Fina' kado ha' hu o'o'
Sa' pokpok yan machom i haga'ga'-hu
Ti siña yu mamañot
Maseha dikiki na pidasitu

Gos makat para bai hu maigo'
Mampos atdit esti na tutmentu
Sumen maipe yu yan masmai masahalom
Despues todu fugu i taotaotao-hu

Yu'os Tata pot fabot na' måhgong yu
Sa' makkat esti na kastigu
Mampos puti mumalångu
Pot fabot gai asi' nu guåhu.



Dumang Yan Doffe'
Huchom i pachot-mu chi'lu
Ya mungga na u annok i dumang nifen-mu
Dalai lokkue esta i idåt-mu
Ya para u taiguenao i nifen-mu

Sigi ya na mafa'maolek ini nifen-mu
Sa' ti na'magof enao ma atan
Cha'mu umachåchåka i pigua
Na enao hao todu muna' dumang

Hago nai poddong todu i isao
Na tumaiguenao i halom pachot-mu
Hagas gaddai hao chumocho fina'mames
Enague hao pa'go nai binecho

Håssan lokkue na un brochas i nifen-mu
Doffe' hao esta gi san me'na gi san hilo'
Mappot hao man åka' pat man ngångas
Mapos na'mamahlao enao lokkue chi'lu


I ICHAN

Sumen atdit i ichan gi hilo' atof
A'gagang kulan mamomodong meggai kaskåhu
Gråsian Yu'us na ti sisisme' gi hålom guma'
Asi'in Yu'us sa' måhgong i minaipen somnak

Kada hu hungok i pinangpang ichan gi atof
Nina' fan hahasso yu' ni hiniben-hu
Mampos ha na' mahåhålang yu pot yuhi na tiempo
Annai dikiki yu' ya tåya' chinathasso-ku

Hu agradesi Si Yu'us ni hana' fan la'la' yu'
Yan lokkue todu ha na'i yu' gi hilo' tåno'
I minagof yan minaolek, lao kontodu i piniti yan chinatsaga
Ti hu miresi siha i mana'i-hu, lao mampos geftao I Asaina

Meggai biahi di hu isague gue' Si Yu'us
Lao tatnai ha renunsia yu na patgon-ña
Tåya siña umigi i minetgot Guinaiya-ña
Yan tai-hinekkok i ina'si'in Korason-ña


Si Biburas

Ekkat fan umessalao
Sa' ti tangga yu karao
Tenga hao chumatfino'
Ya ti maolek enao che'lu

Ekungok lokkue ya un tunggo'
Na i binibu-mu siña hao pumuno'
Maolekña mohon un tulaika
I kustembre-mu sa' mampos båba

Nihi på'go ya ta fan agofli'e
Sa' enaogue' gachong-hu dinanche
Tafan afa'maolek, tafan akomprende
Humuyong-ña man magof hit siempre

Yanggin un yute' todu i lalalo'mu siha
Siempre sumen mangge' sinente-mu gi dia
Angokku yu ya un tattiyi fino'hu
Ya mungga esta fumigan, ya un chagi trumankilu

No comments:

Post a Comment

Tuge' håfa gaige gi hinassomu!

Note: Only a member of this blog may post a comment.