Magof Yu' Ni Finatto-mu! Maila Hålum Yan Ilao Håfa Guaha Guini!!!

Ai ya siña mohon hu ufresi hao gimen pat nengkanu'. Puedi ti un hinalang ya sumåga hao un råtu.
Put Fabot bibira hao tåtte guini mågi ya un bisisita yu' sessu sa' yahu ma bisita!!!



Thursday, April 1, 2021

Guini gi lina'la' gi hilu' tånu', migai minapput, chinatsaga, yan lokkui' piniti. Lao guaha lokkui' ta'lu minaolik, minagof, yan guinaiya.

Hita' ha' la'mun ni titanosta yan i kurasonta. Annai ta atan i uriyåta, hita' la'mun ta disidi håfa ta atendi.
Pues sigun di enao, kada taotao na maisa la'mun yanggin parao magof pat parao istutbao, tristi, pat biburas.
Siña sumåga hao gi palåsyu ya gofsaga hao, lao sumen tristi hao.
Siña sumåga hao gi sadigåni gi fina' lånchu gi hålum tånu, ni tai hanum yan kåndit, lao maguguf hao sa' un kuenta i gråsia yan nina'in Yu'us, ya enao nahongmu parao un nina' maguf.
Hita' la'mun ni minagofta. Likfinu' Nanåhu Biha, yanggin tristi hao, pues isaomu enao. Yanggin layu' hao, isaomu ta'lu. Yanggin guaha sumåsångan hao ya enao nina'bubu hao, pues isaomu sa' un ho'yi.
Hokkuk ha' siña ta maneha na hita ha' na maisa. I sinenteta yan i hinassota. Yanggin un sedi na otru taotao parao disponi hao, pues enao isaomu.
In fin, i minagofta pat i binibuta, ginen halumta, åhi ti ginen uriyåta pat ginen otru taotao. Kumelelekña esti na hokkuk ha' nai siña ta faño'dda' minagåhit, fehman, yan taifinakpu' na guinaiya yan minagof, yanggin ginen san halum kada taotao na maisa.

Ti siña ta dipendi yan ta angokku i minagofta gi maseha håyi otru na taotao. Gaigi i minagofmu giya hågu ha' na maisa, achukka håfa sichuasionmu, ginefsaga pat chinatsaga na bånda.

Saturday, March 28, 2020

Lahin Måmi Si "Mesngun Geftao Santos"

Ha bendisi ham ta'lu i Sainata as Yu'us Tåta gi dia Unu gi Juño gi Sakkan Dos Mit Desi Nuebi (June 1, 2019)


June 1, 2019 - Guam Memorial Hospital


Mesngun Geftao Santos

Annai esta in tingu' na para bai in gai patgun ya para låhi sempri, umadingan ham put para håfa sempri naåña i neni.  Si Stacia sumen malago' na para Chamoru na nå'an. Guåhu sa' malagu' yu' na parao chuli' i na'ånhu "Peter" lao ti malagu' si Stacia. Ilekña na dipotsi na i fine'nina na påtgun låhi na uma fa'na'an parehu yan i tata.

Para guåhu, ti kunfotmi yu' gi na tempu na para ta fa'na'an nu Chamoru na nå'an. Hu po'lu na nuebu esti entri i man Chamoru na ma chocho'gui yan ti ma tattitiyi i kustombrin Chamoru esti. Hu po'lu na sempri i man åmku' man lemlem ni esti na klåsin kinalamtin. Hu ripåra na kulan ma chocho'gui taiguihi niman Hawaiian na ma ayik palåbran Hawaiian para na'an påtgun. Lao sa put i gof sen malagu' si Stacia, hu hoyi ha' na para ta fa'na'an i neni na'an Chamoru.

Ha ayik si Stacia "Ilao" para i na'åña i neni lao, annai hu faisen sa' håfa na ayu na nå'an ha ayik, ilekña na yaña i sustansiåña i palåbran "ilao" ya ha popo'lu na kumekelekña gi finu' Englis "seeking" taiguihi "searching for knowledge" osino mangeketungu'.  Hu sangåni na para i man åmku' na Chamoru ti enao i kinenprendi nu i palåbran "ilao."  I palåbran "ilao" ginen aligao ya kumekelekña gi finu' Englis "to physically search" åhi ti taiguihi mangeketungu'.

Otru na ti kunfotmi yu' nu "Ilao" sa' kana' ha' parehu yan Ely, ya guaha un taotao ni naåña as Ely ni måttu gi gof ti yahu kustombreña na taotao. 

Guåhu, malagu' yu' na para u fine'nina gui' i lahin måmi ni naåña, era tåya' trabiha ni ma fa'na'an nu i na'an ni in ayik. Esta guaha lahihu ni hu fa'na'an sigun as Nanåhu Biha as Regina Espinosa Santos. Si Regino, ni mafañågu ti åpman dispues di finataiña si Bihåhu. Pues måttu gi hinasokku na maolekña na bai in fa'na'an i neni "Mesngun Geftao" sigun di as Nanåhu Biha.

Maila' ya bai isplikåyi. Kada hu hassu si "Mom" (hu ågang "Mom" sa' guiya mismu pumoksai yu' disdiki mafañågu yu' sa' mampus hobin si Nanåhu) hu hassu na sumen chatsaga lina'låña. Ha poksai dossi na famagu'on yan noskuåntos na famagu'on famagu'oña. Si "Pop" ti todu tempu gaigi yan ti ha gof ayuda si Mom yan i familia gi åntis na tempu. Lao si Mom ha usuni todudus i chinatsagan i lina'låña. Pues mesngun na palaoan mampus. Måttu chiña.

Hu hassu lokkui' si Mom na achukka taimanu chinatsagan måmi, yangin guaha måttu giya håmi man aliligao åbiu, gotpi ha' si Mom man nå'i. Enao ti hu hulat kumonprendi gi dinikike'hu lao dispues dumångkulu yu' na manana enao para guåhu.

Pues hu ilao kao guaha esta taotao ni mafa'na'an Mesngun pat Geftao ya gi magåhit, tåya' sine'da'hu.  Pues hu sangåni si Stacia sa' pot håfa siha na rason na hu ayik Mesngun Geftao ya sumen magof gui' si Stacia. Ha sangåni yu' na gof umachaigua i estoriåña yan lina'låña si Nanåña as Doring Lizama lokkui'. Chatsaga lina'låña lao mesngun yan lokkui' måttu gi geftao na taotao.

Otru rason na yanmåmi sa' i sunidon "Mesngun Geftao" sa' goflåhi yan metgot na sunidu. Pues gi finu' Englis "Resilient & Generous" or "Enduring and Selfless" i håfa kumekelekña i naåña i lahin måmi. Leku na måttu gi fehman yan diduk sustansiåña enao na na'an Chamoru.