Nuebu Masodda'

Hu taitai na guaha nuebu mosodda' na diksiunåriun Chamoru ni tinige' as H. Constenoble tåtte gi såkkan 1940 lao ti ma preba na parao ma imprenta sa' mampos guaguan parao ma cho'gue. Alimån Si H. Contenoble ya annai påtgun ha' humånao i familiåña para Saipan gi såkkan 1904. Gi sigenti såkkan man hånao ya man mañåga giya Guam dies åños. Dispues, humånao gue' para China yan Phillipines. Esti na diksiunåru, sahnge' yan i puma'lu siha na diksiunåriun Chamoru sa' ilekña Si Constenoble gi tinige'ña na ti hana' saonao i palabra siha ginen Fino' Españot. Lokkue, ha åluk na ha na' saonao antigu siha na palabran Chamoru ni esta ti ma u'usa guihi na tiempu. Parao ma pula' guatu gi Fino' Englis ginen i Fino' Alimån. Na' magof este, ya hu diseseha na ta li'e' esti chaddek.


Guaha batkåda ginen i University of Bremen, Germany ya ma bisisita i Islas Marianas på'gu na mes. Parao ma presenta guatu giya i Unibetsidåt Guåhån pot checho'niha gi asuntun estudiun Fino' Chamoru. I ma'gas-niha Si Prufesot Thomas Stolz. Ginen hu bisita Si Thomas gi annai eståba yu ma estesiun guatu Germany. Ma estutudia i Fino' Chamoru guatu gi University of Bremen ya hagas di man aligao siha taotao ni siña Fumino' Chamoru. Si Prufesora Rosa Palomo tumågo' Si Thomas parao kumbida yu' guatu parao ma kuestioña yu' yan kuentusi yu' pot i Fino' Chamoru. I man estudiånte siha ginen todus klåsin råsa. Lemlem yu' na todu eyu na mineggai råsa man intirisao parao ma estudia i Fino' Chamoru. Mås ha na' lemlem yu' annai ma fa'nui yu tinige' niha gi Fino' Chamoru ya ma faisen yu' kao man dinanchi siha gi tinige'-niha. Gof maolek bidan-niha lao dipotsi ha' buenti no? Man "linguist" siha pues yanggin linguåhi ma estutudia, diebi di u ma danchi!