Chamorun Amerika

Dies åños ha' i idåt hu gi såkkan 1985 annai fine'nina hu dingu i tano'ta Islan Guam. Man hånao ham i familiåku para guatu Long Beach, California nai man gaige mane'lun Nanåhu siha. Hu sodda' na gof såhnge' i lina'la giya Amerika yan kontodu lokkue' i taotaogue. Mañåga ham guatu gi entalu' sagan Man Meksikånu yan Man Åtilung. Guaha lokkue' noskuantos na Man Gi Samoa yan Man Gi Vietnam yan Man Gi Kambodia na toataogue, lao håssan i Man Åpaka pat i Man Tagålu na taotatgue.

Meggai lokkue Man Chamoru guihi guatu. Hu sodda' na man mama' i Åtilung osino mama' i Meksikånu eyu siha na Man Chamoru. Nuebu este para guåhu na hu chagi lumi'e, i Man Chamoru ni man mama' i otru siha. I Man Gi Samoa lokkue' man mama' i Man Åtilung siha. An manguentus yan i modan-niha, man mafa' i Man Åtilung. Todu ma ada' i kuentus i Man Åtilung pat i Man Meksikånu yan kontodu lokkue man ma usa ayu siha na alåhås ni gof yan-niha i Man Åtilung.

Yanggin hu hasso pågu na tiempu håfa na manaiguihi i Man Chamoru giya California tåtte guihi na tiempo, leku na sa' ti ges meggai na Man Chamoru guihi na lugåt, yan håssan na man man daña' todus, ya man ma tattitiyi ha' i håfa kumalalamtin guihi gi lugåt nai man gaige. Eyu ha' tininggo'niha, sa' gi magåhit, tåya tininggo'-niha put kutturan Chamoru pat i tanota' Islas Mariånas. Enao ha' tininggo'-niha parao ma sångan gi Fino' Chamoru i "Håfa Adai." Kumu ma faisen siha gi Fino' Chamoru: "Taotao månu hao giya Guam?" osino "Håyi familiåmu?" ti siña ma oppi yu' tåtte.

Gi magåhit, hu sodda' na man mamahlao i famagu'on Chamoru parao fanmanangåni otru råsan taotao na Man Chamoru siha. Man ma nå'nå'na' ahåyi siha pues man mama' i otru.

Annai man hånao ham hulo' Washington gi såkkan 1988, hu sodda' lokkue' parehu, lao fuera i famagu'on Chamoru di man mama' i Man Åtilung pat i Man Meksikånu, man mama' i Man Åpaka. Lao hu sodda' lokkue na meggaiña gi famagu'on Chamoru giya Washington man gof banidosu na Man Chamoru råsan-niha. Sessu lokkue' i Man Chamoru man man dadaña tengga para maseha håfa na okkasion. Enaogue' buenti na man mås banidosu i Man Chamoru hulo' giya Washington.

Humånao yu' tåtte giya Guam annai munhåyan i eskuelå-hu ya sumåga ha' yu' sa annai måtto yu gi it mismu tano'ta, sa' hu sienti na enaogue' dipotsi sagå-hu. Annai eståba yu Amerika na lugåt, ha hålang yu' mampos na lugåt. Atdit sinenteku na ti enaogue' sagå-hu, ti enaogue' tano'-hu.

Humålom yu gi militåt ya hu konne' familiåku ya in dingu ta'lu i Islan Guam gi såkkan 2001. Ginen ma estesiun ham giya Germany, pues Washington State, yan på'go sa' man ma estetesiun ham Texas.

Esta mås ki benti sinku ånos disdiki i prumet biåhi na hu fattoigue Amerika na tåno'. Sahnge' ta'lu linie'e'-hu pot i Man Chamorun Amerika. Mås meggai na Man Chamoru man gaige på'go Amerika. Mås dångkulu i giput Chamoru siha. Mås man banidosu pågo' na tiempu. Mås hu huhungok Mamifino' Chamoru giya Amerika. Leku sa' man ma bo'uk meggai na man gai idåt esta ginen Islan Guam yan CNMI ya ma planta siha guatu giya Amerika. Familia pot familia initramenti.

Eståba na ayu ha' i man ma didinggo i Islan Guam yan CNMI, i ayu siha ni man saonao gi militåt. Pågo' na tiempo, meggai na man sibit yan man bibisnis man man håhånao para Amerika sa' ma espipiha mås maolek na cho'chu' yan lina'la'niha.

Lao nuebu på'gu na klassin Chamoru humuhuyung:
"CHAMORUN AMERIKA."

Taiguihi na sahgne' i Man Itiliånu ni man eståba esta noskuåntus na henerasion giya Amerika, yan ayu siha na Man Itiliånu ni man gaigaige ha' giya Itali na tånu', pues parehu ta lili'e ni Man Chamoru. Nuebu esti na klåssin Chamoru. Ma tattitiyi ha' i kustumbrin Chamoru prinsipåtmenti, lao man sahnge' yan i Chamoru giya Islas Mariånas.

Ti man parehu lokkue' todudu i Chamorun Amerika. Man mås åpmam giya California kinu Washington State yan Texas. Giya California ti un geges hunguk siha mamifino' Chamoru, kontodu ayu siha niman gai idåt, lao man gof atdit man fino' Chamoru i Man Chamoru giya Washington State yan Texas. Giya California lokkue kalan man atguyosu ya ma gogof atan håfa guinahå-mu yan håfa i chechocho'mu.

Mampos na' intirisao i ta li'e håfa humuyoyongña i Chamorun Amerika, lao ti mappot ta dibina sa' hokkuk ha' ta atan i puma'lu siha na råsa ni man hagas gaige giya Amerika. Taiguihi ma susedi, para siempri u ma susedi i Chamorun Amerika.