Hinallum Gi Fino' Chamoru.

Annai på'gu humuyung i internet gi noskuåntos na såkkan tåtte na tiempu, humallum yu na siña ta na'setbi para ta aligao yan ta na' huyong infutmasion yan matiriåt Chamoru siha. Lao gi tituhun ha hålang yu' sa' mañodda' yu meggai pot Guam, Islas Mariånas, yan kutturan Chamoru, lao kana' tåya gai sustånsia. Meggaiña ayu i ma e'eppuk siha i tourist na taotao. Pues hu tutuhun lumi'e' taiguihi memorias ni esta måmåfnas pot i hagas kustumbrin Chamoru. Unu gi mås na'hålang para guåhu ni ma poksai gi finu' Chamoru, kana' ha' tåya ma tuge' gi finu' Chamoru, kulolo'ña sa' sen tåya inadingan gi Fino' Chamoru.

Guaha annok noskuåntos na sagan diskutasion gi internet (online forum), lao mamifino' Englis ya meggaiña achåki put taotao ya tåya' puntoña pot Kutturan Chamoru yan Fino' Chamoru. Bai hu atmiti na isao yu' sumaonao guihi gi ayu siha na diskutasion. Ma chagi lokkue' "Chamoru Chat Rooms" lao matto chiña ti ma danchi.

Hu disidi na bai hu chagi fuma'tinas un website ni meggai na'intirisao na matriåt Chamoru. Hu fatinas http://www.chamoruboy.com/ ni gai iyu un bånda ma ågang "Ginen Manu" yan otru na bånda ma ågang "Hinassun Chamoruboy." I "Ginen Manu" na bånda nai hu tuge' Tiningu' Chamoru ni ginen i man åmku' na Chamoru ma såsångan. Ti ayu i masosodda' ginen lepblu. I "Hinassun Chamoruboy" na bånda nai hu "blog" åntes di guaha "blog" gi internet. Ayu na bånda hu tuge' intiramenti gi Fino' Chamoru. Guaha lokkue' båndan "Kåntan  Chamoru" lao meggai siha ni mangångånta, ma kattåyi yu' ya ma gågao yu' para na' suha i båndan Kåntan Chamoru sa' inifefekta siha gi bentasion iyon-niha Chamoru CDs. Put rispeta yan put mungga na bai ma fa' kaosa kontra guåhu, guse' hu komplåsi. Despues noskuåntos såkkan disdiki hu tutuhun i website, sumen dångkulu yan tai arekla. Hu na' suha todudu ginen i internet sa' put bai hu sen arekla di neubu. Esta maloffan såkkan pot såkkan ya trabiha ti hu chocho'gue. Lao naya di hu cho'gue hu tuka mu siriosu ni tina'ne'-hu mama'tinas tråstes håyu pues hu baba un kompanian Fina'håyun Chamoru ni hu ågang "SPJ Crafts and Engraving." http://www.spjcrafts.com/

Suetti na sigi gue' i internet ma tulaika mientras tataigue chamoruboy.com, sigi ma tulaikan maolek i Google yan FaceBook. Mås fåmta i blogging yan lameggai na Blog Chamoru siha man annok. Dos na blog ni sumen paire para guahu iyun Aaron Matanane http://finochamoru.blogspot.com/ yan iyun Påle' Eric Forbes http://paleric.blogspot.com/. Pues hu tutuhun esti na blog ni puru ha' gi Fino' Chamoru. Hokkuk ha' tiningo'hu na tåya' fuera di esti iyoku Chamoruboy na blog ma tutuge' intiramenti gi Fino' Chamoru. Puedi ha guaha otru gi mamaila' na tiempo.

Giya FaceBook sen yahu pahinan Hurao Academy: Chagi Chamoru
Hu fa'tinas un FaceBook Page lokkue Adventures in Chamoru para u ma ketunggo' i Fino' Chamoru.

Gof bråbu yu giya FaceBook gi i Grupun Chamoru siha na pahina, ya sumen magof yu' un dia annai mana' saonao yu gi i Grupu giya FaceBook:  Ta Fanguentos Fino' Chamorro. Gi esti na batkåda giya FaceBook, todudu i man saosaonao man man a'påtte leksion, hinassu, fina'chålik, yan mås ta'lu, ya todudu gi Fino' Chamoru!!!

BIBA CHAMORU!!!