Na' Tunggo' Hit

Hu tunggo' na ti meggai na taotao mananaitai iyoku Blog lao ti ha hålang yu'. Hu chocho'gui esti para ayu siha ni man gof malago' taiguini na matiriåt, puru Fino' Chamoru. Yan lokkue' rikuetdu esti para i man mamaila' na henerasion. Ai mohon no ya guaha "diary" pat "journal" gi Fino' Chamoru, ni tinige' Chamoru siha na taotaogue, gi tiempun Españot?


Hu taitai gi Guam PDN gi tinige' Peter Onedera, na Si Mike Laguåña, ha ufresi Si Peter Onedera para u chule' kåtta siha ni puru gi fino' Chamoru, ginen as Nanåña (Nånan Miget) yan si Miget gi duråntin i gueran Vietnåm lao ti malago' Si Pete, mañotsut despues Si Pete annai yinamak i gima'niha Si Miget ni pakyu ya ma distrosa todu ayu siha na kåtta.

Meggai siha hu resibi esta na e-mail ni ma sangångåni yu na ma agradesi put håfa hu chocho'gui, lao hu aliligao ginen iman gaitininggo', håfa maolek pat håfa båba kosaki siña hu fa'maomaolek todu i tiempu håfa hu chocho'gui gi Blog.

Hu tunggo' na guaha lokkue fuera di Chamoru na taotao tumaitaitai iyoku Blog, era ayu siha man "Linguist" ni ma estutudia i Fino' Chamoru. Segundu na rason na hu chocho'gui esti sa' disdiki ma tutuhun i internet, hu sosodda' meggai na man lachi siha na "tinige' Chamoru" ya mampos ha estotba yu' esti sa' yanggin i man lachi ha' guaha para u ma estudia, pues guse' siempri ma po'lu na eyugui i dinanchi na ihemplu ya ma distrosa ta'lu i fino'ta.....

Pues na' tutunggo' hit håfa hinassun-mimiyu guenao huyung - håfa malago'-miyu, håfa yan-miyu, yan håfa ti yan-miyu. Lokkue' yanggin guaha malago'-miyu paraon faisen hit, bai chagi nina'siñå-hu para bai oppe' ya yanggin ti hu tunggo' bai hu fan gågao inakudin iman gaitininggo' yan man tomtum yan man menhallum siha na man atunggo'hu.