Cha'mu Kumuntentu

Hu hassu gi annai på'gu hu bira yu' tåtte giya Guåm annai munhåyan i eskuelåhu, Si Tihu-hu Joseph "Toting" Espinosa Grecia (primet grådu na primun nanåhu Lourdes), ha sangåni yu' "Cha'mu kumuntentu" Ti hu gos kumprendi fino'ña, pues hu faisen håfa kumeke ilekña ya akunseha yu' taiguini:

"Mungga ma sera na un parehu ha' yan i hagas. Chonnek maisa hao ya un cho'gue todu nina'siña-mu. Aligao månu i chi-mu, chagi håfa tåtnai un chagi gi fina'pus. Hakut i tåtnai ma hakut. Un hago' ha todu i guinifi-mu, solu ti un chagi tumaka'. Kumprendi ya un tunggo' ni gi kada taotao, hita ha' na maisa itmås dångkulu na chinemma, åhe ti i otru - hita na maisa ha'. Yanggin un kumprendi i fino'hu tåya hao siña lumångli."

Hu hassu ha' fino'ña Si Uncle Tot, lao maloffan såkkan pot såkkan åntes di hu kumprendi kabåles fino'ña i kilisyånu. Annai ma gradua yu' ginen i Guam Police Academy, ha faisen yu' kao hu hassu håfa fino'ña nu guåhu. Pues ta'lu annai ma gradua yu gi Unibetsidåt Guåhån, ha faisen yu' ta'lu. Taigui gi annai ma gradua yu' gi University of Washington School of Law, lao ti nisisåriu esta mana'fan hassu yu' ni esti na tinemtun akunsehu - esta chettuttun gi hålum titanos-hu.

Esta påpågu, ti kuntentu yu!