I Chinatpagu' Gera

Meggai na Man Chamoru yan taotao Maikrunesia mampinino' osino manchetnudan nu esti siha na gera ni kana' dies åños esta na inapmam, Gueran Irak yan Geran Afghanistan. Militat yan Sibit man dimåmålas. Guaha siha tiningo'hu ni man matai yan man chetnudan. Diduk man inifekta nu i familian-niha. 

Annai hu tutuhin esti i mina' kuåtru na deployment para guåhu, estaba yu' Bagram, Afghanistan na ma po'lu yu'. Kåsi tres pat kuåtru biåhi gi simåna man hanao ham guatu gi flightline para bai enfañaonao gi sirimonias para ayu siha na man matai ni para mana' fan hanao tåtte giya Amerika. Meggaiña na biåhi ti unu ha' na atahut. Tengga tres pat sinku pat siette, lao un dia hu hassu na guaha katotsi gi un dia. Maseha kuåntu biåhi humånao yu' para ayu na sirimonia, mamapput ha'. Hu hassu i taotao siha ni man gaige gi halum i atahut siha. Hu hassu i familian-niha, i mañainan-niha, i asaguan-niha, yan i famagu'on-niha. Hu hassu na måkpo' esta lina'la'-niha. Tåya otru chånsa para siha. Estague' mañe'luhu i chinatpa'gu' gera.

Hu gågao na u ma transfera yu' para otru na lugåt fuera di i Division Headquarters giya Bagram para bai chagi macho'chu' gi san hiyung i kellat. Ma sedi yu' ya gaige yu' på'gu giya Ghazni, Afghanistan. Guaha lokkue' otru siha na Chamoru man gaige guini lao ti man parehu ham na unit. Hassan ham man ali'e' sa' kada diha siha man man håhånao huyung gi chalan, yan sessu yu' lokkue' humånao huyung lao sahgne' hinanao-måmåmi. Mampos piligru i hinanao-niniha sa siha krumukrusa i chalan parao na' sigiru na tåya' bomba.

Gi nigapña ti humanao yu' huyung ya tåftåf gi ega'an guaha hu hungok man e'essalao "Hayi gai haga' A-Positive, alulåyi, falågu guatu gi espitåt sa' guaha man chetnudan yan guaha esta tres man matai. Påkpak un bomba huyung gi chalan!" Kana' tres pat kuåtru biahi gi mes guaha påkpak bomba lao kada dia man ma papaki hit ni atmas yan grenade. Hu faisen i taotao ni ume'ssalao håfa na unit man pinakpak ni bomba ya ha sangåni yu'. Bongbung i kurason-hu sa' iyun-niha na unit i Man Chamoru na atunggo'-hu. Hu ågang iyun-niha unit ya hu faisen håyi siha mampininu' yan man chetnudan. Ti siha i Man Chamoru, lao hu tunggo' ha ayu siha niman matai.

Unu gi tres, på'gu mañågu i asaguåña tres dias. I fine'nina na patgun-niha. Hobin na kasamientu. Ti humånao i boi para i fina'ñågun i neni sa' ha disidi na maolekña yanggin ha nangga para i fandångun i che'luña palao'an dos mesis dispues. Ha po'lu na siempri lameggai gi familia mandaña' gi fandångu ya eyegi mås maolilik na tiempu parao chule' iyoña kinsi dias na leave. Ai na nina' triste humuyongña.

Otru gi tres, gi pupuengi åntes di masusedi i påkpak bomba, mattu gi ufisinå-hu parao fatinas appointment sa' guaha ha nisisita ayudu gi ligåt (asuntun lai) na asuntu. In fa'tinas i appointment para dos dias dispues. Lao enfin, uttimu ti umali'e' ham. Hu li'e' gue' annai ma kakatga i atuhotña guatu gi hålum i helicopter.

Nigap, unu niman chetnudan, matai lokkue' gi espitåt.Todu i kuåtru, sessu hu li'e siha gi hålum sagan mañochu. Ti gos dångkulu esti na lugåt ya siña un ketunggu' håyi man gaige gi uriya. Ayu siha ni man dimålas, ti ma miresi. Tayuyute' gi as Yu'os ayu siha niman matai yan chetnudan, yan i familian-niha ni man sen inifekta.