Håssan Tinige' Gi Fino' Chamoru

Ti ges meggai na taotaogue man måmångge' gi Fino' Chamoru. Buenti sa' ti man påyun i man mapoksai Chamoru man mångge' gi Fino' Chamoru. Gi magåhit i Fino' Chamoru, ti ma tuge' gi hagas tiempu. Ginen i pachot ha' na manunggu hit. Ti ginen lepblu. Pues siña lokkue' ta åluk na håssan lokkue i taotaogueta manaitai tinige' Chamoru, buenti parehu ha' na rason, sa' ti man påyun hit. Para håfa lokkue' di ta puni na kalan gai minappot lokkue'.

Lao kao magåhit na mappot mångge' gi Fino' Chamoru? Estague sessu hu hungok ginen otru taotao. Bai atotga sumångan na åhe' ti mappot. Yanggin un gef hassu, mappotña mångge' gi Fino' Englis kinu Fino' Chamoru.

UTTAGRAFIA
Gi Fino' Chamoru, un simbolo gi un hongga. Lao gi Fino' Englis kada råtu ma tulaika i areklamentu. Un simbolo siña sahnge' para un sångan dipendi gi håfa na palåbra.

Lao fuera di i uttagrafia, meggai hu sodda' tinige' Chamoru ni ti kumprendiyun. Yanggin parao ma danchi nai i tinige' Fino' Chamoru, pues diebi di u ma tuge' gi Fino' Chamoru. Mungga fine'nina gi Fino' Englis pues ma pula' guatu gi Fino' Chamoru. Estague sessu ta lili'e' gi Kåntan Chamoru. Kao guaha na un hungok Kåntan Chamoru ya mappot para un kumprendi? Buenti nai ma pula' ginen Fino' Englis.

Bula lokkue' sinångan gi Fino' Englis ni tåya' chilongña gi Fino' Chamoru. Pues yanggin ma pula' guatu gi Fino' Chamoru, ti kumprendiyun.


Pot ihemplu:

"He was full of B.S."
"Bula gue' tåke' toru"

Para i natibu na Chamoru, ti u kumpbrendi håfa ilelek-mu yanggin un sangåni pot otru taotao na "Bula gue' tåke' toru."

Yanggin ma tutuhun fine'nina gi Fino' Englis, ya ma pula' guatu gi Fino' Chamoru, libiånu mana' lachi i tinige'. Meggai hu lili'e gi dos klåsi, i matuge' Fino' Chamoru ha' yan i matuge' Fino' Englis fine'nina ya dispues ma pula' guatu gi Fino' Chamoru. Mampos sahnge' i dos yan gof libiånu magacha'.